笛子摸曈

YO!食軟飯使乜驚呀

Decrease Font Size Increase Font Size 文字大小 列印

Rlsd7AK

 

要食軟飯(即係女人搵錢多過你,或者身家多過你,喺埋一齊嗰陣佢養你多過你養佢),喺香港地,今時今日有好多隱世軟飯王,女友搵錢多過你絕對唔係咩出奇新鮮事。所以食軟飯而家嚟講,唔係咩羞恥嘅事,仲為港男增光添。

當今社會就算你唔係食軟飯,香港地男人地位點都俾比女人低,你話圍頭D套丁就冇計啦。以法律保障計算,男女朋友付出計算,乜嘢男女平等都係女權至上。唔好睇少女人個智能電話,根本就係虎符帥印,手下「兵士」點只一千幾百。可想而知,女人個個都係麥克阿瑟。其實港男唔食軟飯,一樣受盡白眼,你幾有上進心都好,上進心唔值錢,回報率低一樣係俾港女睇唔起。邊個話戀愛唔涉及經濟投資。

 

女友既父母眼中,如果你只係一個文職,萬零二萬蚊,你都係一條廢柴,冇人會睇得起你,以前一句「餓死老婆瘟臭屋」大概就係咁解。就算港男搵三幾萬一個月都好,只要你個女友人工同你差唔多,或者都仲係高過你,你就同其他食軟飯嘅巴打一樣,外家點都睇你唔順眼,覺得佢個女係公主,要個公主喺出面捱世界,跟住你咁既廢柴,一定冇好日子過,起碼過唔番以前「開心買鞋,唔開心都買鞋」嘅日子。外家有錢你仲大獲,外家當你狗咁看待,日日叫你搵多d錢先養得起佢個女,又話夢想唔會發達,搵過份工,打多兩份工,讀多幾年書之類,咩玩音樂冇錢途,做藝術攪創作即係聽乞米,忠於理想仲衰過坐洗頭艇偷渡返大陸雀仔按摩。所以,橫掂你點樣做,你都達唔到外家反地心吸力嘅指標,不如就乾乾脆脆做個食軟飯嘅廢柴,起碼食軟飯唔傷胃。

 

首先,食軟飯唔一定要靚仔,有六舊腹肌,但一定要好口才,腦筋轉數要快,做開廣告設計嘅就比較有優勢。要迎合女士口味,要博學多才,才華洋溢。有時女人只要一愛上你,係完全盲目,好似楊千嬅首歌話齋,「世界將我包圍,誓死都一齊」,所以只要令佢愛上你,喺冇神一樣嘅對手出現之前,港男都係安全嘅。

 

揀目標係最緊要,最易莫過於搵一個佢愛你多過你愛佢既女人。樣貌身材年紀都絕對唔重要,最緊要有錢。你一畢業就有車有樓,絕對唔難,廢青們話咁快就變咗繼承者們。而家好多人話港女拜金,佢地儲埋咁多金,最好就係俾軟飯王食晒。再拜金嘅女人都會有軟弱既時候,都會有盲目嘅時候,再理性嘅女人始終都係有感情嘅動物,除非佢係鐵血觀音。當然亦有一種女人係一開始就拒絕窮撚,呢種女人係要花好多時間去釣,所以要先查家宅啦。如果係小甜甜既話,花十年八年重金搵加藤鷹學好點樣按摩再去打動佢都值得。大部份拜金港女都有個弱點,就係年齡到咗自己條底線但係又冇著落嘅時候,大部份港女都會稍稍降低一下要求,好似話「五官端正,無需要靚仔,吳彥祖嗰type就ok啦」,啱啱合格。呢種女人最後大部份都可以話係求其搵條佬嫁撚左去,最後一樣係搵個窮撚,仲可能係一條爛滾爛賭既窮撚,當然亦都有人強調我單身,我好快樂啦。所以女人嘅眼角唔係一世都咁高,各位巴打唔使怕。

 

當然唔係個個女人都會釣到上手啦,要睇情況。正所謂小財唔出大財唔入,要同港女鬥,點都要課金。但係課金呢個情況唔會keep到好耐,好快可以連本帶利收番,先決條件緊係要佢愛上你,幾拜金嘅女人都有弱點,其實港女並未去到蝗蟲咁完全拜金,要整個30米高嘅人像嘅情況。開頭就可能下下講錢,因為佢地未有感情同你講,又或者呢個係試驗你會為佢付出幾多。但請巴打記住,釣魚係要有耐性,同埋要有本錢上限。例如佢大約有500萬資產,你最少要用番20,30萬黎溝佢,同埋要俾番個止蝕位俾自己,所以軟飯唔係人人食得起。

 

如果巴打本金唔多,冇錢就要講內涵,正如某文章講到,港女最怕男人幼稚,玩高達,睇《戇Scout打爆喪屍城》呢D係唔成熟嘅表現,夠mature嘅港男應該有獨特氣質。所以你要多才,扮勁,扮有taste,做個偽文青。呢樣嘢就梗係講天份啦。睇多D神之水滴,扮下紅酒專家。考個珠寶鑑定牌照,熟讀每一隻名牌子。睇多女人湯丸嘅J文,讀下Daisy Wong嘅心路歷程,得閒抄番幾句出嚟嚇下鬼,學好D英式英文,甩走D港式讀音,正所謂取易不取難,佢同你計時,你唔好同佢計較,要慢慢拖。直到佢慾罷不能嘅時候,就係絕地武士忍辱負重反擊嘅時候。食軟飯預左冇面,冇晒大男人主義。不過就算你唔係軟飯王,你面對香港女人,一樣係冇咩面子可言。港女最唔識就係俾面人,唔夠知情識趣,所以都係嗰句,橫掂都係,不如做個仆街啦。

 

好多人話港女貪錢,冇波又阿之阿左。其實掉番轉睇,先行後一萬步,如果個節目係由男人選女人。未見到樣或者身世,係人都會揀個後生,靚女,有氣質之類。之但係一起底,知道原來係小甜甜對港女A,我相信絕大部份男人都會揀小甜甜。橫掂都係俾人叫狗公,點解唔做隻食牛扒既狗公,而去做一個豬狗不如嘅太監小X子丫。其實個節目只係娛樂性質,有哂潛台詞,鬥立場鬥臨場演技,大家又何需真心對待呢。港女又唔係全部貪錢,佢不代表我。我不代表佢。貪錢係好現實既問題,唔係港女嘅專利,正如你一畢業就想買樓一樣,各取所需姐。港男要保衛理想同上進心,點解港女唔可以做財富投資?

 

正如有港男話某D港女賣鮑,你有能力一樣可以賣海參,開條海味街丫笨。人其實冇高低級之分,對某D人嚟講,打工搵兩餐都係叫cheap,應該一出世就做老闆。係人都想啦,個個有頭髮又點會有烏絲素出現。為咗錢有人可以埋沒良心,可以走水貨,可以挺而走險,冇一個原因比為錢更合理。 所以有位戀愛達人話,戀愛係一種精神病。你為愛情不為錢,無條件付出,不求回報,你一定係精神病。

 

=============================================

Mall Mall Store貨品來自英美,代購費用低廉!

http://bit.ly/29bRWoO

經連結申請DBS Black World MasterCard,新客戶即賞額外1,000里數,迎新優惠可享$1.2=1里。

https://go.dbs.com/29fpTdL

iHerb售賣美國有機健康產品、日用品、護膚品等等,買滿指定金額可享免費順豐送貨。首次購買結帳時輸入DCP206折扣碼,可享$5 USD折扣。

http://bit.ly/29hCycg

=============================================