【風月亭情感信箱】點解開始時乾柴烈火，過咗熱戀期就咁冷淡？

photo via cc flickr user Nikita Storozhuk

讀者來信：

點解次次同異性一齊開始都係乾柴烈火，但過咗熱戀期地方就掛住打機對我不瞅不睬非常之冷淡？
以前佢一放工就即刻搵我，而家佢放工幾時放去咗邊都唔講聲，
我同佢講個好多次如果唔鍾意我感覺轉淡左不如大家分開下，佢又唔肯，
但平時又對我唔好，連情人節食飯都要我夾錢，生日禮物一個蛋糕，最近我發覺唔見左佢上年比我嘅生日禮物，我好傷心係到喊，佢一啲反應都冇仲叫我唔使搵，唔好嫌惡我流落去佢手上面嘅淚水。
佢平日放假都掛住宅在家打機可以唔同我出街，佢細過我五年，平時所有家頭細務已經係我做晒，好多成年人基本嘅知識佢都唔識，好似湊仔咁。
我為咗佢已經拒絕左好多人，其實剛剛開始我只不過係對佢有好感但係當初抵受唔住佢嘅追求，一齊左發現自己慢慢對佢有感情鍾意左佢，點知我鍾意左佢嘅時候佢就已經冇咁愛我，
而家甚至乎對我仲差過一個普通嘅男性朋友對我，發生任何事情都要向其他男性朋友求救，姊弟戀係咪一定冇好結果？但係其他追我嗰啲又唔鍾意，因為佢哋個樣太老成，雖然佢哋係會比較細心同埋成熟但係我想追求一啲戀愛嘅感覺。

亭長回應：

越愛越懶，其實好多情侶拍拖拍得耐都會咁，追你果陣當然出盡奶力討好你，到咗手唔再玩咁多浪漫橋段都係正常，特別係以我觀察大部分香港男仔其實都唔好呢味，除非係娘娘特別要求就唔同講法。一齊耐左，熱情不再係無法避免，唯有靠一啲小驚喜去維繫一點火花：男朋友唔再日日接放工，但會唔會見今日好日就靜雞雞黎接你；追到手唔再帶你去高級餐廳，但今日紀念日就煮返餐比你啦。咁樣就叫做懶咗，但仍然有心去維繫。而你講到你男朋友對你差，其實憑單方面證供我判斷唔到啲咩，因為有啲男人係真係會覺得慶祝同送禮物好無謂，但唔一定係因為佢唔錫你。至於你話佢唔做家務，呢個係男人天性，家務嘅野卸得就卸。講到尾，相處有問題唯一解決方法係坦誠相對，搵次攤出嚟講啦！

副編回應：

學亭長話齋，男人喺追你個排同追到手之後真係可以係兩個世界，所以佢對你有落差真係好正常。仲有就係，男仔一般都比較遲熟，佢仲要細你五年，所以你所講嘅唔嗲唔吊等問題都係好常見，呢個情況唔係佢對你熱情返就可以解決到，更需要你用耐性去幫佢培養返啲交待。正所謂「愛是恆久忍耐」，每個人都會有缺點，要發展一段關係就係需要雙方嘅磨合，而要唔要結束呢段關係，都係要睇你愛佢嘅程度，夠唔夠抵銷返你對佢嘅忍耐，但點樣都好，你地都真係需要坐低認真傾一傾，等佢講下其實佢而家對你有乜睇法，再咁樣磨落去其實都唔係辦法，只會浪費時間。

各位讀者如有興趣來信，請參閱以下連結：

http://eros.vjmedia.com.hk/mailbox

作者 亭長

你好，我是總編輯，又稱亭長。