月經杯—正L度hihi！

生活喺亞熱帶及熱帶嘅女仔，嚟m完全係一種煎熬。究竟有幾唔舒服唔洗多寫，男仔如果唔明可以問阿媽，如果有女仔覺得嚟m好開心、好快樂，快啲話我知你係點做到。為咗減低黎m嘅「不適」，市面上有好多好多女性衛生用品聲稱可以紓緩𠴱種「不適」，又棉條、又防漏邊、又液態m巾，上述咁多樣我都試過，冬天都可以嘅，夏天係邊樣都唔得，尤其姐仲鐘意水上活動，上面三種都幫唔到我。

結果有次喺網上面搵到月經杯，雖然都唔係咩新鮮嘢，不過見到覺得好吸引，就做足功課，從軟硬度、摺杯方法、清洗方法都搵哂，就揀左捷克既lady cup。用左三個月，即係嚟左三次m，用後感係：正L度hihi！

當然唔係一上手就用得好好既，第一次用之前其實要好好認識一下你嘅身體，搵到入口，亦要學識溫柔咁放入去，唔可以夾硬塞；呢啲都可以事以上網找吓各種用家tips之後自己實習下。當然，要用得好嘅秘訣係practice makes perfect。其實只要試多幾次，好快就會上手。月經杯既更換唔似換m巾咁方便，要有一個乾淨嘅廁所，同埋身上要帶清水，而且亦唔可以心急，心急分分鐘會搞到放入去放到打側咗，就會搞到漏m。仲有，換嘅時候雙手要洗乾淨，避免感染。一般月經杯最長6至8個小時換一次，過程保持乾淨就好安全。

由於用過覺得好正，我就同啲朋友仔推介下，然後畀人問得最多嘅一個問題就係：你唔怕整穿個處女膜咩？冇錯，呢個係普遍亞洲女仔問嘅問題。我嘅答案係：我唔想因為一塊膜而要承受n年嘅唔舒服。我覺得我嘅身體由我主導，我要對自己好啲，唔會因為日後伴侶嘅判斷而委屈自己。自我詛咒係：真命天子唔知幾時出現，可能到我停經𠴱日都唔出現，唔通我都為未來都唔知會唔會有嘅人個個月焗到生粒粒？我覺得有塊膜唔代表我好貞潔，冇塊膜唔代表我好隨便。有塊膜一樣可以愛撫，口交等等；冇塊膜但我婚前婚後只有一個性伴侶，就係我老公。講到尾，係你點睇件事，唔係他人去判斷。

不過，如果你都係怕，都睇到呢度我多謝你。各位女仔，錫自己係由自己做起，唔係靠其他人㗎！

附lady cup 官方網頁：https://www.ladycup.eu/

作者 黃琉

90後女生，不諱風月之事，強調女性性自主。