2015-03-01  Gay故佬  Gay , LGBT , 同志平權 , 性別 , 愛情

【丹麥遊蹤】Gay Pride

 

北歐人一向好平等，對於性小眾好包容，同性公民結合甚至落實唔問問題，唔問健康狀況，唔洗睇醫生就可以更改性別既政策都係丹麥行先。丹麥人都唔會因為你唔係直而歧視你（我當初揀丹麥個陣都無為意丹麥咁好），因為北歐好強調自主性，只要你做到野，你鍾意邊個佢地無必要過問。係咁既文化之下，LGBT人可以無需要擔心生活上會因為佢地身份而受影響，可以安全咁做返自己。

為左鼓勵所有LGBT人做返自己，爭取平權同埋令公眾知道佢地不過是個人都會難堪，美國人係1969年率先開始搞pride parade（驕傲遊行），參加者可以曬身材，可以易裝扮下女人扮下男人，可以揮大旗派condom，或者著得同一般出街無分別，最緊要你舒服。呢個風氣傳到去歐洲，丹麥係1996年開始搞，每年都有一大堆人加花車（話就話花車，其實只係一大堆人係架改裝左既貨車上面party飲酒跳舞）由 Frederiksberg Have (berg=山，have=花園) 行去 Rådhuspladsen (Råd=國會, hus=屋, plads=廣場，國會廣場)，而2013年有96個個人/團體參加，好多係LGBT團體（唔一定要係專門爭取平權，有d group只係聚集所有打波玩golf揸電單車的面孔同埋消防員警察醫生護士barkeep司機IT清潔呢d聯誼會），drag queens，其他特殊癖好（姐係重口味）者同埋其他地方既pride parade代表，不過最多既都係丹麥既gay bar同club，一來慰勞員工同埋獎勵常客，二來宣傳自己，一般人就通常會定係一個位睇曬所有花車，但係都有人者會一齊同花車行，一齊去到rådhuspladsen跟住開P。一日既pride parade當然唔夠玩，所以就變成左四日既慶典，日日唔同活動，星期三玩到星期六。日頭就有有益身心既活動例如踢波瑜珈鄭多燕同埋辯論（你無聽錯，確實係辯論），晚飯時間就選美drag show唱歌，打後就係club歌跳舞時間，玩到11至12點先完場，為丹麥夏天畫上完美句號。

 

好多花車

 

我係八月初初去到丹麥個陣睇到Copenhagen Pride呢樣野，因為我性格鐘意做後援多過直接玩，所以就膽粗粗係只識Ja Nej Tak呢三個單字既情況下申請做義工，竟然得左，每日4點放左學就去Pride Square （成個rådhuspladsen既地方）後台做支援。係後台有咩做呢？個description就話係搬搬抬抬D舞台equipment同埋大型道具，不過我都係搬得個一兩次，做得最多既反而係執垃圾同埋清理後台地方。後台係分左兩部份，一邊係義工休息食飯吹水地帶（比較乾淨），一邊係表演者休息同埋VIP吹水聯誼地方（超級污糟），我就兩個地方都會清理，但係我大部分時間都係VIP區清理同反佔中遊行差唔多level既垃圾。

 

第一日5點到達Pride Square，囉tshirt同埋少少briefing，跟住就係出去聽人唱歌，個節目名寫話HIV in music，我只係哦左一下，因為我當時唔識丹麥文唔知佢地唱D咩。佢地搵左D歌喉一般既歌手唱下歌跳下舞，最搞笑竟然係同一個（個人覺得麻麻既）歌手係個一個半鐘既show出左黎三次，每次唱一兩隻歌，咁不如一次過唱曬啦。第一日既節目就以全部歌手同DJ一齊跳舞完美結束，打後就係狂播club歌。我今日比較少留係後台（因為差唔多無野做）所以都係搬酒去Pride Square既bar度。個義工長好好奇我點解一到丹麥就即刻去做義工，我就話：香港無呢D野玩。跟住發生咩事我唔記得，但係如果佢問點解既話，我會答：「香港呢個社會，人人表面都係度扮Open扮先進但係內心盲塞，咁既環境點會有人敢行出黎？」

 

呢個就係個個環保重用既歌手，個人覺得編曲中規中矩，但係個歌手低音唔係好掂，而歌詞呢..好直接XD

 

最後一班人一齊跳舞

 

義工福利：每日五杯免費野飲，我唔鐘意啤酒就全部都百事

 

後台發現既性玩具

 

第二日下晝係運動日，一大班人一齊瑜珈同做aerobics，跟住睇人踢波，食飯時間過就有Drag Night，丹麥各地（尤其係哥本哈根）drag queens一齊上台跳舞，真係男男老少咩都有。我因為語言不通既關係無咩同佢地傾計，最多都係問我邊度黎同埋點解走黎做義工之類，不過佢地都好驚訝竟然有香港人去丹麥讀書（雖然我再三強調我是high school exchange而唔係真係讀書）。因為丹麥人好鐘意飲酒食煙既關係，今日開始多左野做，但係都算輕鬆，因為佢地始終要表演而無狂飲，兩杯起四杯止，一前三後，少少high多多趣非常健康。

 

染髮染到好似Rainbow Dash

 

Zebra Lady

一眾表演者合照

 

第三日既重頭戲係第八屆Mr Gay選美大賽，而今日亦都係我最辛苦既一日，因為真係好_多垃圾！Mr. Gay後台有一個VIP party專供參加者既朋友，丹麥中小名人同埋（最緊要）班sponser睇完Mr Gay之後坐下吹下水飲下酒咁，由六點半開始到十一點班人就係度飲飲飲，而飲酒呢個動作就令到我覺得呢五個鐘完全同免費勞工無分別：

1. 垃圾亂揼: 因為啤酒用膠杯裝（用玻璃的話隨時變做殺人武器），丹麥人飲酒又唔翻用D杯，所以每人十杯八杯之下淨係VIP區都成千個膠杯，飲完一杯就擺埋一邊，明明隔離就有個垃圾桶；食完支煙就隨便揼落地下踩熄，明明行多20cm就有煙灰缸。地下煙頭膠杯滿佈，垃圾箱爆滿，如果話個度係垃圾站應該真係會有人信。我因為要經常彎低執垃圾，所以搞到我條腰酸到一個點，有時見到有人想揼垃圾就即刻比個垃圾帶或者煙灰缸佢，費事煩。

2. 點人唔洗本: 倒瀉嘢落地下最後係我囉紙巾抹（跟住又要我執），煙灰缸滿左又要我清（如果唔係佢地會搞到煙灰滿大地），當個show開始左一半而我係度食完晚餐玩電話hea個陣，佢地突然要包曬送比所有表演者既花。我對住堆花，心諗：你唔係應該一早包定架咩？

3. 好很無禮貌: 我見到檯上面有堆半滿既膠杯，以經驗嚟睇應該已經被人拋棄，當我諗住囉去揼個陣，係我半米外背對住張檯係度同人吹水既男人（好似係）竟然華麗180度轉身，用食指Nuh-uh我！我係心中即時用三文四語爆左一百次粗。

 

你唔_揸好杯野你怪我揼你杯野？我當時係好有衝動將佢成個人揼落堆填區，但係因為當時對於丹麥話粗口唔太熟悉，只係識得句sutter min pik（我俾碌蕉你含），所以無法還口，只可以講聲undskyld（sorry）繼續執垃圾。

 

包到我死死下既花

 

講返個比賽先，今年（2013年）既參賽者有一半係二十幾歲，一半係三十以上，最特別既就係有個貌似六十幾歲既啊伯叫Rune嚟左參選。成個show同一般選美差唔多，都係時裝catwalk（Rune著到成個小朋友咁），泳裝catwalk（後生個堆全部都好slim無胸，越老越多肥肉，不過Rune就唔算肥），同埋才藝表演。班參賽者有個玩呼拉圈（個人認為最有睇頭），有個唱歌（歌喉非常一般），有個跳熱舞（一睇就知唔係跳舞中人，手腳無力既），有兩三個做棟篤笑，有個就係個台上面真情獨白，而Rune就跳類似社交舞既東西。

 

 

最後，跳熱舞個個後生仔贏左Mr Gay，而個啊伯就咩都無。成個節目完左之後，參賽者同班VIP一齊係後台開party慶祝同埋吹下水，而我望住佢地個陣，發覺原來佢地都有份製造垃圾，煙頭酒杯又係亂咁揼，屌！
當我執垃圾就嚟崩潰個陣，Rune竟然走過嚟，拍我膊頭，同我講：”You’ve done a really job keepin this place clean. Keep up the good work!”（你清理呢度做得好好，繼續努力！）。當時我好想揼低手上既垃圾袋攬實佢然後同佢瘋狂道謝，但係因為我手上有個垃圾袋而佢又著緊佢套小朋友衫，所以都係作罷。我望住又一個參賽者丟煙頭落地下，心裡面唔係諗緊d老人家教養好好多丹麥d後生好唔顧人成日飲醉搞事搞到我呢d義工變成免費勞工囉搞錯啊，而係：點解佢地又煙又酒，可以keep得咁_好既？

玩呼拉圈個個參賽者係度排練緊

 

望住鏡頭有獎牌個個就係Mr. Gay既冠軍

 

我返屋企個陣因為太肚餓所以買左個kebab食，就從此踏入三十冠娜（四十幾港紙）既kebab地獄，萬劫不復

 

星期六就係重頭戲Gay Parade，呢日我四點先需要去舞台當值，所以我自然就去左行parade，順便影下相。個個都未出發先興奮，係出發點已經有大把人合法聚集，好多花車上面已經開始有DJ播歌同有人飲酒跳舞（丹麥人真係全天候飲酒的），當然有好多盛裝同埋無上裝既男男女出嚟比人影相啦，一路個氣氛都好歡樂。

唔講咁多啦，睇圖啦~ （輔仁因篇幅所限未能show晒所有圖，想睇就去【我個page】）

 

軍裝男女

 

2013年打頭陣既係消防車

 

好多人

 

係咪好熟口面呢？就係頭先個個性玩具啦

 

呢個drag queen好好人，好怕醜，但係上台表演唔錯

 

粉紅救兵丹麥版

 

白頭到老就係咁

 

有人係花車個度揼個condom比我:o

 

怪叔叔

 

「要唔要腸仔含下或者打下?」跟住就掟左出去比花車既人（雖然最後被花車輾過）

 

有香吻 ，真係唔要？

 

坐住輪椅唔代表唔可以行出嚟

 

大波整多兩籠

 

呢幾位係因為佢地既身分而向丹麥申請左政治庇護既難民

 

很有愛

 

鴨鴨皇后

 

SM綑綁組 今晚好好懲罰你

 

超人的秘密武器

 

丹麥國鐵DSB既花車其實係火車 隨車附送長腿美女車務員 食用前請先確定對方性取向

 

沙士比亞筆下既皇帝出場啦 聽講佢係劇團團長定係EU代表

 

哈 你個戇鳩仔

 

電死了我

 

唔知點解只係聯想到張敬軒…

 

一柱擎天嗚啊

 

接吻的一刻

 

 

最後遊行隊伍到左國會廣場，有d人講下野之後就即刻開始左個final show啦。丹麥好多明星都有份演出，包括【13年五月恰恰贏左Eurovision既Emmelie de Forest】(https://www.youtube.com/watch?v=p3f9v8ebuD4)，不過我一個明星都唔識（而Emmelie de Forest我要等到九月膠事錄post Eurovision 2014 波蘭參賽歌曲先知道有呢個人），所以錯過左好多合照既機會（sosad）。唱歌唱到八九點之後就開始party mode，幾千人係國會廣場一齊跳舞一齊high。今日後台無咩guest，所以我多左機會出去睇下。出到去，見到有幾個人一邊跟住節拍跳下跳下一邊玩grindr（Gay人識朋友同埋約砲會既app），我覺得好得意，點解明明大把其他member係度一齊開開心心你都要grindr傾計？當然我知道我呢d只係識係後台睇住grindr勁多靚仔而唔夠膽出去同佢地一齊跳舞既人係無資格批評人既，所以我最後都只係係後台執垃圾跟住用grindr煲仔。

今晚我留得特別夜，十二點個party玩左我都未走。係所有人走晒之後，我望住無人既國會廣場，突然明白到絕望既感覺。成個廣場垃圾滿佈，根本同堆填區無分別。我係心裡面再爆多幾次粗之後，都係用掃把慢慢掃晒D垃圾去側邊方便垃圾機清理。呢個時候，我見到Alex（唔係學聯個個）。佢高高瘦瘦，非常白淨，個頭經常炒高，係一個酒吧義工，之前係bar囉飲品個陣見過佢，覺得佢幾cute。當日佢著住黑色jacket白色恤衫棕色西褲，掃地個陣非常有型。當時我其實好想同佢傾下計，但係當年的我非常的怕醜，好驚同人small talk唔知講咩既尷尬場面，所以最後都係無同佢傾計就走左啦。

 

Studiestræde係丹麥有名既Gay bar區，係去火車站之前我去左打個白鴿轉，好多人啊～

 

今次gay pride雖然係比較辛苦，不過幾好玩，尤其係見到丹麥人對LGBT人咁包容，覺得我誤打誤撞去左丹麥其實都唔錯。

 

後記：係gay pride前，我係一個丹麥本土LGBT社交網站開左個account。Gay Pride完結幾日之後，我開我個inbox，發現有一個叫做Alex既人hi我。

呢個人，原來就係當日我見到個個。

待續…