2015-03-09  膽生毛老死  性愛 , 甜故

連載小說—《地獄異聞錄》（一）：【皇城之下】

（編按：嗚呀，好感動，呢個係風月亭第一篇連載小說。）

 

 

首先，本人隆重聲明，以下所有故事並唔係本人親身經歷，而係「朋友」經歷。

 

呢位朋友係本人死黨———膽生毛先生。點解佢叫膽生毛？除了因為佢後生個陣，都係因為「血氣方剛」而「色膽包天」外，更因為佢「天生異稟」。可惜，佢異稟的地方不在子孫根（當然，我地大哥之後先發現，原來下面越異稟，D女女反而越唔鐘意），而異稟在塊面上！ 皆因，佢面上有塊好大好大好大、好大好大好大嘅黑痣，仲要係痣上生咗一束長毛，正宗「陰毛生係塊面上」。

 

D人成日講「Your face, your fate」（你樣子如何，你命運也如何），但係膽生毛次次聽到呢句說話，都嗤之以鼻。皆因佢家住種植道，即係山頂，剩係佢自己都有三間房，一間睡房，一間玩具房，一間書房。所以佢雖然咁樣衰，但係從唔愁冇女，因為當女士們知道佢家底個陣，個個都主動黐埋去。所以佢從來都唔溝女，因為係女溝佢。

 

不過呢，《地獄異聞錄》就唔係講佢溝女或女溝佢的故事，因為要寫故仔就要寫埋埋牙性愛鏡頭。無論女溝你又好，定你溝女都好，上過床然後寫返情節出來，就係「趙完唱」，實在太唔道德喇，就算我地唔係大中華膠，又唔多知咩係普世價值，但我地就算縱然一時高舉「城邦自治」，一時高舉「獨立建國」，我地都講道德架嘛，呢點係我地同上面最大分別，就係「講」道德！！！所以，「趙完唱」嘅行為，我地不屑做！ 之不過，如果班女女係有「中介人」介紹就唔同，因為咁樣就係「正常貿易」、促進經濟發展，係值得表揚的行為，咁就要大講特講喇。

 

因此，《地獄異聞錄》係講我﹏﹏﹏朋友膽生毛係「強國」，即全球最大經濟體同軍事最強嘅「龍之國」嘅滾女軼事同所見所聞……

 

【皇城之下】

 

（一）

 

 

雖然膽生毛身邊不乏女女，但因為塊毛大痣關係，佢雖然外表風光，但內裡自卑，所以同女士們都係嘴下摸下算，而唔肯破處。次次女仔問佢點解唔肯拔出寶劍，佢都懶有型咁話：「我要留返比我最愛的人，就係我將來嘅老婆！」

 

不過男人，啊唔係，應該係人總係講一套做一套架啦，佢點會唔想破處丫。 由於佢自卑心作祟，唔敢同「正常」女仔做愛，於是，佢只好暗暗地打算講處男第一次奉獻畀「中介人」介紹嘅女女，即係叫雞！

 

不過膽生毛咁有家底（而唔係有米，因為佢老豆從來唔肯將錢過俾佢手，佢只係靠阿媽俾有「幾個零」的零用錢而過活），當然唔會好似我同你咁，第一次叫雞唔係爆馬欖就係撳鐘仔，而係走去強國買服務。當然啦，唔係咩常平或對面河個D地方，而係一係唔去，一去就要去最勁嘅地方–––首都「皇城」！

 

呢件事已經係好耐之前，當時膽生毛剛剛18歲，要行成人禮嘅時候。 毛媽媽知道個仔咁大個人第一次要出門遠行，仲要係自己一個去強國首都，當然好肯擔心啦。出門口個時，毛媽媽俾了樣傍身法寶佢，就係黑卡一張，然後千叮萬囑：「仔，記住，去到上面，第一，幾時都要『洗手洗手洗手』；第二，無論幾時，都唔好認自己『來自香港』；第三，千祈唔好飲made in 支那的奶……」；後生仔就係咁架喇，阿媽未講完，就已經出了門口；就因為膽生毛冇聽埋落去，漏聽仲有兩大未講的戒條，縱使聽咗亦一樣，因為唔會上心，結果，膽生毛去到強國，犯曬「五大戒條」，結果闖下彌天大禍，黑仔過俾人形龍蝦擒！ 而神奇嘅事，當然係強國首都「皇城」發生……

 

（二）

 

 

神奇嘅事，當然係強國首都「皇城」發生，因為作為強國之都，天下事都盡發生其中。當然，荒謬國度，就連最荒謬之事也必在其內發生。 話說膽生毛一落機，就當然要入境喇。當時由於未「回歸」，仲係民主黨叱咤江湖、爭取「民主回歸」（你話班友咪同阿嬌姐一樣「很天真很傻」囉，回歸返去一個獨裁老虎懷中，又點會有民主丫！人地會俾民主你，就唔叫獨裁啦！真係ON能9！）的年代，所以當時入境仲係要排長隊。

 

當膽生毛等咗成半個幾鐘都仲係排緊長龍的時候，見到遠處有強國人高舉「20元特快入境」的紙牌，就即刻就埋去問：「真是二十元就可以特快入境？」

 

高牌男：「當然是嘛，我們強國人最講信用的，這，還要問嗎！」；於是膽生毛即刻攞張廿蚊「毛幣」（點解叫毛幣？因為一來銀紙上印住一個叫毛主席的頭，二來個D銀紙確係成日出現毛弊出來；就係同一時刻，突然有個揸住「XX旅遊」旗的導遊走埋來：「還有我們整團旅行團，一共二十人，二十塊二十人，行嗎？」

 

膽生毛個頭一轉：「喂，你識我架？唔好認親認戚喔。你地要特快入境，自己出錢啦！」

 

導遊：「我梗認得你啦，毛大痣嘛，有冇錯先？你唔係毛大痣，仲有邊個會係？！」

 

正當兩位拗緊時，舉牌男：「行啦行啦，不用吵，二十塊二十人就二十人，沒問題啦！」

 

膽生毛：「你剛才不是說二十塊一個嗎？現在怎會是二十塊二十個呢？那不是對其他顧客不公平嗎？」

 

舉牌男：「這就是我們強國的『好客之道』，當然希望各位旅客賓至如歸；至於說公平嘛，這種事是相對的，大家開心就行喇。」 膽生毛都費事講落去，益埋班白撞旅行團，跟住舉牌男走；結果，佢地係寫住「貴賓通道」的一道門，唔駛查證件就入到境。

 

（三）

 

 

唔駛查證件就入到境，膽生毛第一時間去酒店擺底行李，就出去覓食啦。 作為佢老死，一早同佢介紹，要女，當然就要去演藝大學﹏﹏﹏旁邊間酒吧啦（雖然我都係聽返嚟），事關好似佢咁有錢嘅人，都係去個度選貨包女，因為演藝大學嘅女學生都會去個間酒吧做part time，搵full time！即係搵到人包，咪就係full time囉。而演藝大學學生，通通都係未來主播、歌星、影星等等，全部都係一等一貨色。奇怪係，個度學生全部清一色女仔，而且就算學校放假，都一樣咁多學生返學，認真神奇。

 

不過唔理咁多，膽生毛係酒吧坐低後，除咗兩杯啤酒，竟然冇女侍應埋身招呼佢。鬼咩，原來去親個間酒吧，唔係咩大人物或富二代，而係佢地助手。佢地有個dress code，就係Polo shirt攝入條西褲，加拿大位夾住個LV公文袋，左手攞「大哥大」電話，咁就代表佢地係富豪的奴才，幫老細揀卒，認真「天生一副奴才相」（咩叫「天生一副奴才相」？睇下689被習大大召見時，個種卑躬屈膝就知啦！然後受主寵幸後，出來見記者，代表習大大傳話時個種意氣風發，前後兩個樣就更加明白喇！奴才就係對住主人就死狗，係群眾面前代主人辦事就懶威威的蛋散！）。 既然膽生毛冇著dress code，自然冇人騷佢啦。

 

佢懷著失望心情同等待奔放的小弟弟行返酒店時，突然有幾個大媽出現面前，問︰「靚仔，要不要服務？」「靚仔，你寂寞嗎？」

 

膽生毛：「服…服…服務？你們提供服務？」

 

其中一個大媽笑著：「哎喲，老娘老喇，怎可能服務靚仔。但老娘帶你去一個很多美女的地方玩玩，好吧？」

 

正常來講，膽生毛一個人去到陌生地方，當然唔敢跟住大媽走啦；之不過，18歲仔血氣方剛，細佬又舉頭求救，係色膽包天情況下，就膽粗粗照跟。結果，就跟左上一架白色但係灰塵處處的殘舊TOYOTA私家車，唔知轉左幾多個彎、行左幾多條凹凸不平的路，就去到一棟好殘破嘅商業大廈，係漆黑一片既大堂入左一部爛溶溶嘅lift。

 

膽生毛當時心想，死啦，樓又殘、lift又舊，今次俾人賣豬仔喇。點知lift門一開，除咗見到金碧輝煌的大廳外，兩排每邊十多名穿著旗袍的靚女，或穿著西裝外套白色底衫做底的男士齊齊鞠躬大叫：「大哥！歡迎光臨！」

 

（四）

 

 

「大哥！歡迎光臨！」…正當膽生毛陶醉緊平生第一次、仲要咁多人一齊叫佢「大哥」嘅時候，有個經理已經帶左佢入房，一間可以坐成廿人、有兩張玻璃檯、洗手間、兩部電視的房。 膽生毛已經好醒，睇出咁既格局一定好貴，就問有冇細D的房，同價錢點計。

 

經理：「大哥，放心吧，大房細房，價錢都是一樣的！我們的啤酒是兩百塊十二罐，房錢五百，生果那些是我們的小小心意，不用錢的。聽你的口音，大哥，你是從香港來的，對不？」 膽生毛當然忘記了出門口個陣，阿媽吩咐落千萬唔好係強國入面，話自己來自香港的戒條啦，結果……哼哼！不過又咁講，有幾多仔女會聽父母嘅說話丫。而經理聽到膽生毛自認係來自香港，嘴角不期然翹了一翹。

 

膽生毛心想，計埋女女，最多咪千幾兩千蚊埋單，化算！ 接住，經理帶左五六條女入來，條條女唔係著短裙、熱褲，就係心口有個大窿，不過個樣就……各花入各眼啦。 雖然冇合心水嘅女，但人生路不熟，唔敢問仲有冇女，就求其選件長頭髮、大約十六七歲的熱褲妹，之後就猜猜枚、飲飲酒咁啦。而飲酒，其實就犯了佢阿媽原本想同佢講「千萬唔好係強國亂飲飲食食，因為個度好多黑心食物」的第四條戒條。

 

猜猜下枚，熱褲妹就話：「大哥，啤酒有氣，我怕喝了會長胖，我可以喝其他的酒嗎？」

 

膽生毛：「那你想喝甚麼酒？」

 

熱褲妹：「我想喝Whisky，行嗎？」

 

膽生毛：「你的英文怎麼突然那麼標準？那麼Whisky多少錢一杯？」

 

熱褲妹撒嬌：「只是一百塊一杯，大哥，你不是不捨得嘛！」

 

膽生毛心想，最多咪十杯八杯，埋單都係二千幾，算啦。

 

第一次玩，當然冇咁放，大家都係好斯文咁猜下枚同飲下酒，正當膽生毛惆悵究竟有冇得破處時，熱褲妹突然將隻雪白小手仔放在膽生毛的胸膛上：「大哥，你想要嗎？」

 

膽生毛雖然第一次玩，但都意識到咩事啦，但又怕被人鑿，於是係答應之前問：「那麼我們這個……這個要多少錢？」

 

熱褲妹：「大哥你是說做愛嘛，只是五百，就在這裡做就行。」

膽生毛：「就在這裡……」

 

（五）

 

 

「就在這裡……」即係就地正法，話明人生第一次，咁精彩情節當然留返後少少先再交待返啦，家陣講下完事之後發生咩事。 大部份男人腦中，射精就等同做愛。射完精，如果對方係良家婦女，就推開人地唔理佢，而自己就抱頭大睡；如果對方係性工作者，直頭叫對方即刻著衫走人。

 

膽生毛一來都係男人，二來未知咩叫做「愛」同冇離細心，所以出完火、破完處，俾埋五百蚊條女，膽生毛就急急叫埋單，趕住返酒店訓覺。

 

於是個位經理手奉單據咁，再次出現。膽生毛已經準備定三千蚊，心想多出幾百蚊當小費，話曬人生第一次要豪氣D，唔好學做生意嘅老豆咁寒酸。

 

點知一望張單，係五位數，膽生毛大罵：「有沒有搞錯！他媽的一萬二千塊！你們弄錯吧！？Whisky要九千多塊？你們不是說一百塊一杯嗎？」

 

經理：「對不起，大哥，請等一等。」，然後經理行出門口。 唔駛兩分鐘後，有兩個貌似一代「性神」徐錦江身形、起角平頭裝、身穿灰色班點T–shirt的彪形大漢入來，然後大力拍檯：「怎麼，兄弟，你開心也開心過啦，怎麼現在說我們搞錯！這是甚麼回事？」

 

之後另外一個大漢攞起隻剩餘少少whisky嘅杯，蕩一蕩，然後將杯放係膽生毛鼻前，大聲問：「你喝喝，這是甚麼，這是好的威士忌，是一百塊呀，但是是一百塊一安士，你們喝了那麼多好的威士忌，怎麼不給錢？是否不當我們是兄弟，要賴賬？」

 

膽生毛個刻咩膽都嚇破啦，又唔知自己係邊，又怕隨時俾對方殺左都唔知，但銀包冇咁多現金，張黑卡又係酒店房，只好 口震震：「老兄，是我搞錯，對對對，是很好的whisky，但是小弟身上不夠錢，要回酒店拿。」

 

大漢：「行，放低你的皮包。」轉頭用眼角瞟一瞟一位男仔，道：「小陳，過來，你跟著這位兄弟回酒店拿錢！」

 

之後，又係起角平頭裝，但係身形瘦小，身穿白色底衫嘅年青人入來，脅持住膽生毛返酒店。

 

待續

文．膽生毛老死