黑彩虹

〈點解男人鍾意黑絲?〉(上)

Decrease Font Size Increase Font Size 文字大小 列印
(photo via cc flickr user Mark Roy)

(photo via cc flickr user Mark Roy)

 

 

〔警告:本文為極度艱深之學術文章,閱讀前請作好心理準備!〕

 

 

 

首先,如果你打算反駁我標題既立論:唔係個個男人都鍾意黑絲(所以我無話全部)、我唔鍾意黑絲但係我鍾意白絲/紅絲/橙絲/灰絲/肉絲/黃絲/藍絲/粉絲……(黑絲is just a symbol),你可以慳返啖氣,返上一頁睇其他野。好,家下入正題。

 

 

 

小弟作為一名人類學的學生、師承人類學之父法國學家李維-史陀1)我每次經過書局(文青假日必到之地),就會順手拈起李維-史陀的中短篇文集《我們都是食人族》好好觀賞一番,雖然至今仍未讀完,但相信李維-史陀一直與我同在,自稱為人類學學生且師承李維-史陀並不為過。,對於人類社會風俗習慣有一定既認識,以下我將會從人類原始社會既習性,輔以現代文學理論其中一大支柱結構主義,分析到底點解男人會鍾意黑絲。

 

 

 

如果你睇完上面果段,居然仲選擇睇落去,閣下一定係一個道貌岸然既咸濕偽文藝青年,試圖為自己一D被社會貶為怪異既性慾幻想,尋求一個支持自己既學術理論。唔緊要,明白既,搵食啫。人為咗係社會上生存,無可避免要戴好多個假面具,係其他人面前隱藏真實既自己。無錯,係每個人都係咁,男人係咁,女人亦都係咁。絲襪,就係女人其中一個假面具。

 

 

我地首先假定「男人鍾意黑絲」呢個論點正確,咁我地要解決既問題,就係「女人點解要著黑絲先?」其實就得三個可能性既啫,一,女人因為「男人鍾意黑絲」而抗拒著黑絲;二,女人因為「男人鍾意黑絲」而著黑絲;三,女人著唔著黑絲根本唔關男人鍾唔鍾意事。

 

 

 

首先駁斥第一個可能性。如果女人因為「男人鍾意黑絲」而唔著黑絲,代表住著黑絲對於女性係有損害(而且可以合理推斷呢種損害源自男人對黑絲既喜愛),但事實上我地幾乎每一日都見到有女性著黑絲出街,若然著黑絲真係損害女性權益,斷唔會有咁多人自願著上黑絲,所以我大膽否定呢個可能性。如果第三個可能性係啱,但係喺我地假定左「男人係鍾意黑絲」呢一個前提底下,如果亦都有女人係著黑絲既話,即係代表住女人對於「男人鍾意黑絲」呢樣野基本上係唔抗拒,唔會因此而唔去著黑絲,而我地亦可以推斷到喺呢個前提底下,女人著黑絲並唔會對自己既利益有損害(因為如果有損害就唔會著啦)。剩返第二個可能性,女人因為「男人鍾意黑絲」而著黑絲。假設呢個可能性成立既話,代表女性從「著黑絲」呢個行為當中,可以獲得利益,而且利益主要來自男性。因此我地必須要搵出女性著黑絲到底有D咩好處。

 

 

 

兩性關係自古以來都係權力鬥爭既結果,女性主義尚未抬頭之時,女性既政經地位遠不及男性,而男性亦將呢種權力牢牢掌握係自己手中。女性為咗分享呢種權力既成果(金錢、身份地位等),唯有用佢地既天賦--自己既身體--黎作為佢地既籌碼,以從男人手中交換佢地所渴求既野,而呢種行為直到現代社會亦都屢見不鮮。可能有讀者會challenge我:喂你咁即係物化女性啫。無錯,呢個的確係物化女性既行為,但如果你根本意識唔到呢個行為係物化緊女性,其實你係唔會有個自覺去改變,所以點解我特登講出黎就係咁解。但係好老實講,我並唔認為女性以身體交換自己想要既野有咩咁不道德。不過要詳細講呢點就會離題萬丈,所以我地都係返去正題。如果女性為左爭取自己想做既野,係以自己既身體吸引作為手段,咁好明顯,女性要做既事就係增加自己既吸引力,而著黑絲就係增加吸引力既其中一個方法。

 

 

 

去到呢度,我地又返返原來既問題:咁究竟點解男人鍾意黑絲先?第一個原因,正如上述所講,絲襪係女人既假面具,夠假。所謂既假,唔係話你要去整容乜乜乜,亦唔係話著左黑絲睇落瘦D(咁可能都有少少關係掛),而係話,當你著左黑絲之後,絲襪既黑色完全遮蓋住你一雙原本係肉色既腳(你可能話呢個黑絲理論未必適用於黑人女性,但係試問呢個世界上有邊個黑人既皮膚係可以黑得過一對黑絲呢?),呢一種既反差正正就會挑起人既好奇心,繼而對你雙腿以至成個人產生興趣,背後既理論係來自俄國形式主義評論家什克洛夫斯基所提出既陌生化理論,中心思想就係指出,人類對於習以為常既事物並唔會有太大既感覺,反而當呢D普通既事物以一個出乎意料、怪異甚至係荒誕既形式再現既時候,我地既大腦需要比平常運算更加多先可以解讀既話,咁我地就會對呢樣「陌生」既事物產生興趣,甚至會從呢種要花腦筋既思考當中得到快感。

 

 

 

文學上有非常多既例子,例如魯迅先生既著名短篇小說《阿Q正傳》,〈序〉入面以相當既篇幅介紹使用「正傳」既原因以及阿Q既來歷,就係極佳既例子。而當然,單係文章名稱有「Q」呢個英文字母,就已經係一個好好既例子。而其他藝術方面,拎個近期D既例子黎講,就係李逸朗翻唱經典名曲〈傻女〉既手法,而效果大家亦都有目共睹。再引申落去,某程度上亦可以解釋到黃子華所講既「人生不如意事十常八九」點解實際統計上只係「十常一二」。2)詳見黃子華棟篤笑《越大鑊越快樂》概括黎講,所謂陌生化就係將一D平常你睇慣睇熟睇厭既野,以一個新既方式(通常會係比較繁複)再現,令你重新認識呢樣野,從而產生快感。

 

 

 

情況就好似你行行下街,見到有個人行為舉止比較奇怪,例如一個男人一路行一路搲佢下體(大部分人都唔會咁做丫?),又或者係一個女人係咁揸自己對波(都無乜人當街當巷做下話?),甚至係有人突然好大聲鬧佢隔離條友。當下你好容易比呢D野吸引左你既注意力,但係細心諗下,其實呢D行為又有幾咁出奇先?喂你痕唔會搲既?只不過依家唔係背脊痕係春袋痕咁解啫;揸波都係求快感啫,哦你玩電話轉珠Candy Crush就得,人地揸兩下波你就有意見;鬧交都係正常社交行為啫,講野大聲D其實都唔係罕見丫。個癥結就係在於,呢D好平常既行為,出現左係一個你意想不到(或者好少會發生呢D事)既場所,因而令你產生好奇心,吸引到你。同樣,係我地既認知當中,腳就緊係肉色架啦,依家有個黃人/白人女性居然有對黑色既腳,完全係違反左我地普遍既認知,就係呢一下細微既吸引力,擴大到後來既性吸引力甚至係迷戀。

 

 

 

雖然一開始講到我係人類學學生,但係呢一篇基本上只係從結構主義角度分析黑絲問題,完全無觸及人類原始社會既範疇。由於我怕各位消化唔切,於是決定暫時收筆,留待下回分解!

 

 

〔再警告:本文純屬鳩噏,並非精密科學,文章內容只供參考〕

 

 

 

=============================================

Mall Mall Store貨品來自英美,代購費用低廉!

http://bit.ly/29bRWoO

經連結申請DBS Black World MasterCard,新客戶即賞額外1,000里數,迎新優惠可享$1.2=1里。

https://go.dbs.com/29fpTdL

iHerb售賣美國有機健康產品、日用品、護膚品等等,買滿指定金額可享免費順豐送貨。首次購買結帳時輸入DCP206折扣碼,可享$5 USD折扣。

http://bit.ly/29hCycg

=============================================

   [ + ]

1. 我每次經過書局(文青假日必到之地),就會順手拈起李維-史陀的中短篇文集《我們都是食人族》好好觀賞一番,雖然至今仍未讀完,但相信李維-史陀一直與我同在,自稱為人類學學生且師承李維-史陀並不為過。
2. 詳見黃子華棟篤笑《越大鑊越快樂》