2015-03-20  無妄齋  性別 , 黑絲

【偽學術系列】黑絲誘惑研究，好似係

 

《偽學術系列》之所以會寫呢篇，查實係朋友彈咗篇《點解男人鍾意黑絲？》(上)過我睇之後有感而發。雖則自己唔係太熱愛黑絲(謎之聲：咪扮嘢啦，鹹濕你就認啦麻甩佬！)，但閱後仍然深覺不足，不吐不快。不過放心，保證以下內容同原文係一．啲．關．係．都．無．嘅，主要會用「撚化心理學」(a.k.a.演化＋比較心理學)嚟探究呢個相當之「物化女性」嘅問題。

 

 

閒話休提，首先講吓最常聽到(尤其係出自女人口中)嘅講法：「唔使審梗係班死毒膦睇得AV多，唔係OL就係女教師嗰啲變態嘢啦！」嗱嗱咪急住反駁，事關根據撚化……咳咳比較心理學呢，由AV不時出現「黑絲」而令男人聯想到「性愛場面」，又不完全係亂噏嘅。

 

 

眾所週知，科學家周不時都會用動物做實驗嘅。話說喺過程中佢哋發現祇要利用特定嘅外在條件刺激，動物係會表現出當配偶出現先會引起嘅性反應，而呢種現象叫做「性條件作用」(Sexual Conditioning)。

 

 

用雄性白鴿為例，測試時將一啲無關交配嘅視覺刺激連同雌鴿一齊擺喺雄鴿視線範圍以內 (例如打一盞紅光燈)，經過多次結合展示之後，當收埋雌鴿再放返相同嘅視覺刺激出嚟嗰陣，雄鴿亦會表現出典型嘅求偶動作，例如「姑姑、姑姑」咁叫、不斷點頭、原地轉圈等等。換言之，見到黑絲就幻想到男女交合畫面，係有可能的。

 

 

當然，亦有男士會自辯：「唓，我都唔睇AV嘅！」(謎之聲：你睇啲「難忍」幾咁虛偽！)

 

 

呵呵……唔緊要，當然唔止咁簡單啦。按演化論之父達爾文(Charles Darwin)對人類情緒嘅解釋，女性嘅「羞怯」(Shyness，「怕醜」)亦係由演化而來，而最原始嘅狀態可以喺動物界中搵到，並且係按照性周期而產生的。要注意，性周期同埋怕醜心態，係動物求愛嘅主要條件。

 

 

起初，怕醜係雌性動物拒絕交歡嘅訊號，因為佢哋還未到發情叫春嘅時節。不過當時節蒞臨嗰陣，怕醜心態仍然存在，但當情緒同雌性內在嘅性衝動、外在嘅雄性刺激(求偶行為)結合以後，就成為若即若離、半迎半拒嘅獻媚，到呢個時候，雌性對雄性就變得時而接近、時而逃避，或者係逃避之餘，走嘅路線卻係圍繞雄性嘅圓圈。

 

 

大家不妨想像吓男女喺花間撲蝶，男士喺後面追呀追，女士喺前面跑呀跑，但往往保持喺一個男士追到嘅距離，重一路嗌住「嚟追我吖哈哈！」咁樣樣，所以呢種心態同行為表現實情係相當複雜的。

 

 

參考性學家靄理士(Havelock Ellis)嘅演化心理學描述，去到人類習性再分析「怕醜心態」，大致有以下三項：
一、上述由於發情期不合，拒絕男士求偶、性交嘅表示
二、源自一種深怕引人憎惡嘅恐懼心理。由於性器官同排泄器官嘅出口幾乎處於同一位置，而排泄物係污穢、無用的，動物界普遍有呢種自覺。呢種怕醜心理，往後就逐漸轉移到厭惡自己醜陋嘅生殖器官身上
三、衣服裝飾嘅發展，一面培養矜持心態抑制男士嘅欲念；一面亦成為獻媚嘅工具，進而刺激男士嘅欲念。矜持過後半推半就，矛盾之中體現平衡，更是引人入性，你哋明啦

 

 

係咁怕醜心態同黑絲又有咩關係呢？實情係出放啱先提到對性器官嘅厭惡。由《聖經．創世記》已經開宗明義講到，阿當夏娃兩公婆食完善惡果實覺醒咗之後，第一時間就用無花果樹葉織條裙嚟遮住重要部位啦。而女人著黑絲其中一個原因，正是由於著裙時得條窄小得可憐嘅底底並唔足以遮住裙下春光，而黑絲喺私密位置嘅密合正好加強返掩蔽「元性徵」(Primary Sexual Characteristic，a.k.a. Sex Organ)嘅效果。

 

 

無論如何，怕醜背後代表節制嘅力量，會令男女積存欲望過程免於匆促，亦令女士較為從容觀察與比較向她求愛嘅男士品性嘅機會，選擇認為最適當嘅配偶。雖然由原始狀態經歷文明而變得分散、改頭換面，但隱含嘅原理大體相近。

 

 

積欲過程若然從生理角度睇，就係各種官能刺激直接或間接引起：感官攝受外間嘅五覺，造成刺激，喚起反應，最終積存欲望。而依照各種反應強弱作為標準，揀選至能合乎心意嘅對象，我哋稱為「性擇」(Sexual Selection)。

 

 

有說達爾文提及性擇干係到物種繁衍，但後來嘅學者卻根據研究及觀察結果，紛紛對偏重審美嘅性擇影響程度表示存疑；而自從避孕技術帶來的性解放以後，傳宗接代呢項功能已大體從男女享受魚水之歡中剝離。但畢竟性擇係發乎本能，所以祇係被內化而未有完全消失，而審美條件亦隨住時代變遷而有所變化，尤其以攝受範圍最廣嘅視覺為至高無上嘅官覺。

 

 

於是返到黑絲嘅話題，事實上要追溯到腳先。由於女性開始發育時，臀部、大腿會不斷積累脂肪，於是成為「次性徵」(Second Sexual Characteristics)，發育良好者代表有較好嘅生育能力，而撇除生殖因素的話，「美腿」就意味住強烈嘅性暗示。

 

 

還記得《Silent hill 2》嗰隻由兩副女性下肢組成嘅怪物「Mannequin」嗎？故事設定中怪物係出於男主角嘅心理投射，妻子長期患病以至死亡，令男主角性欲無處宣泄，而呢種壓抑後來在「Red Pyramid Thing」捉住「Mannequin」做出各種猥褻動作中得以印證。(謎之聲：妖，死腳膠！)

 

 

係咁黑絲嘅作用又係咩呢？簡單少少講就係女性多數為美觀，男性則覺得突顯女士嘅「次性徵」。

 

 

女士由化妝到襯衫都熟悉運用色彩心理學原理，例如化妝喺兩頰打陰影中間打高光，人會顯得較瘦。原因係乜？話說色彩嘅色相同明度兩項因素，影響人對物件大小嘅觀感，尤其以立體更為明顯。暖色同明度高嘅色彩具有擴散作用，故此物體顯得比較大，相反冷色同暗色具有內聚作用，令物體顯得較小。冷色系譜中，明度較低嘅顏色我哋稱之為「收縮色」，故此明度為零嘅黑色正好是收縮色當中嘅表表者。

 

 

所以話，女士樂於用黑絲襯衫出街，一來顏色百撘，二則會顯得本來較豐滿嘅下本身變瘦，身體比例攞返平衡。

 

 

若然係全黑嘅絲襪，由於無咗明暗對比，結果過猶不及，於是喺喺外國除非是嚴肅莊重嘅場合如喪禮都唔會著；透視度較高的黑絲，則因為中間密度較低兩側較高，明暗襯托增強雙腿立體感，更能呈現腿部的修長曲線，故此成為從事「服務性行業」者嘅首選，而嚴格嚟講喺西方社會亦基於呢種勾起性聯想嘅「唔莊重」而少有登大雅之堂。

 

 

與此同時，並非所有女性雙腿都係白璧無瑕的，有的可能如齊昕在Instagram展示的滿是淤青疤痕，有的則毛髮較粗糙濃密，也有的是因天氣乾燥而龜裂的。一旦穿上黑絲，也就起了遮瑕作用，視覺同觸感都有「幼滑」的感覺；當然唔少得就係絲襪有束住脂肪避免贅肉下垂嘅作用……就好似香腸嘅腸衣咁囉，何況由火腿變成黑豚火腿，級數都唔同啲啦下話。

 

 

綜合以上，雖則黑絲呢家嘢係女士無心插柳，但遮掩「元性徵」而強調「次性徵」，巧合地符合矜持而引發嘅性誘惑，故此深得男士青睞。吟詩都有「千呼萬喚始出來，猶抱琵琶半遮面」，黑絲背後嘅萬種風情，大家也就心照不宣了。(謎之聲：睇吓睇吓，重唔認係變態！)

 

 

至於去到再重度啲嘅黑絲迷戀，例如會著住絲襪打丁嘅男士，由於構成理由更加深層，而且呢種習慣未至於相當地普遍，有少少又帶到戀物之類異色癖，我唔係好熟書，墨水有限，就放棄了。(其實係小弟懶，吖哈哈～)

 

 

好，就寫到呢度為止。