我在強國參與土豪婚宴（一）

(photo via cc flickr user Cormac Heron)

先此聲明，呢個故事係亭長既真實經歷，但某部份細節會經過修改，因為我唔想死。有機會返大陸豪飲既話你地真係要試下，係一個幾有趣既體驗。

簡單交代下背景先，我屋企識得新郎哥，果次係全包式請我地去當地一個城市度飲（唔開城市名，我唔想死），姐係包機票酒店交通膳食。至於新娘屋企，係果個城市度係數一數二咁有錢，有N咁多間廠，乜野生意都撈下。至於呢個童話故事既背後意義，係成功需……你懂的。

第一日朝早去到香港機場，我地集合後就坐飛機去到果個城市，一落機就有司機叔叔同專車迎接我地。佢車左我地一行十幾人去左一個景點度玩，全程有個壯漢（保鏢？）跟住我地執頭執尾，壯漢怕我地攰，唔比我地自己行路參觀個景點，堅持要我地坐電動車環島，坐完兩轉就走，好走馬看花囉。

到左夜晚食飯，佢帶左我地去一間海邊既酒樓，上到頂樓，首先經過左一個好精緻好靚既日式庭院，行到盡頭見到我地既貴賓房，D裝修真係Grand到喊，我地張檯既正中間放左好多好多新鮮花，一堆花瓣係中間散落，我心諗，D花做乜春？我原本以為開始食既時候佢就會收走D花，但係佢無咁做，成晚就係聞住中間D花食野。

間房個落地大玻璃仲望到無敵海景，好鬼死靚，食物有鮑魚、龍疐、蟹、瀨尿蝦、螺……樣樣都超好味（但係之後餐餐都食呢D我就開始好掛住譚仔同營多），飽到我死仲係繼續上菜，新郎哥話佢地既文化係咁，個份量一定安排到你食淨，如果張檯清得晒就代表安排飯居果條友辦事不力。最好笑係D侍應，佢地應該係我見過最好服務既強國侍應，勁好笑容，每個步驟都勁小心勁有禮貌，好似驚死犯錯會俾人抄家咁。

食完晚飯，新娘預告聽日行程，佢話食完早餐去佢屋企參觀，打完個白鴿轉應該都夠鐘食午餐。席間有條友忍唔住驚呼：「喂你屋企大到咁？打個白鴿轉都要幾個鐘？」我心諗：「可能人地起左個主題公園自住呢。」

返到酒店，D房好靚好豪華，後來聽佢地講間酒店好似係個新娘屋企有份開。第二日先係正式去飲，會有更多新奇有趣既野，好彩有黎見識下姐。

待續。

作者 亭長

你好，我是總編輯，又稱亭長。