我要真‧性取向！

最近我笛子摸瞳放咗個短假，過大海update下自己，參觀下上世紀濠江風月－－媲美石塘咀嘅三層樓下街。今日想由一個平日少人用嘅角度睇一樣嘢同一個好短嘅例子，就係性取向。就算當中牽涉太多宗教觀點，我都要學哥哥首＜第一次＞話齋「何妨全力試，不要問我非與是」。

同性戀，變性人，喺大部份宗教教義同埋封建社會裡面都視為禁忌，係罪，對於講求「一夫一妻，一生一世」嘅宗教嚟講甚至仲衰過七宗罪。但係身為21世紀人類，心理學裡面都有講過”Nurture nurtures nature”，即係「後天環境改變先天」。咩叫後天？咪就係宗教、教育、家庭環境、朋輩關係囉。點解宗教行先？你留意下周圍，宗教團體學校周圍都係，唔數N間幼稚園，香港4百幾間小學，6百幾間中學裡面有幾多間有宗教背景？我都有宗教背景啦。

作為一個追求思想自由開放，率性平等嘅人，係絕對唔會對任何人標籤，更加唔會理會別人嘅喜好，除非佢要改變我嚟滿足佢自己。任何人對我嚟講都係平等，唔理你咩宗教背景、性取向、學歷、總之溝通到就係朋友。溝到咪溝囉，溝唔到都可以人體漫遊下嘅……對我嚟講，結婚前唔犯法嘅我咩都要試。

同性戀本身為宗教所不容，而掛著宗教的同性戀嘅係自相矛盾嘅行為。對住伊甸園入場券救阿婆忍尿－－老「西門」都唔放，你係永遠都活不出真我，講咩自由意志，人地袋住先，嗰D人就自欺一世，但係當中最弔詭嘅就係點都要選擇一個要令自己講大話講足一世嘅信仰，仲衰過唔等劉皇叔。如果你認為伊斯蘭國殺害異教徒是殘忍行為，某班宗教者逼迫同性戀嘅精神虐殺就真係口號話齋，一生一世。

就算係我讀緊嗰本嘅教義認為我們本來有罪。認為性是可恥的。但係世界已經變咗咁多，仲有埋Lady Gaga嘅”Bad Romance”，望住勇敢表達雙性戀嘅Miley Cyrus，點解仲要捉緊過時嘅文字同戒條？今時今日個個都放開隻駱駝－－沙漠之舟啦。咁點解今時今日個個仲抱殘守缺呢？其實當每個宗教都抽出「導人向善嘅大愛」呢個common factor之後，剩番D咩呢？

無論是異性戀，同性戀，雙性戀，或者戀物（唔包括戀動物，咪搞騾仔同牛油狗），我們都認可任何能幫助你性生活的戀物或其他癖好，只要係建立於唔強迫他人嘅基礎上，體驗民主……唔係，係自由。

異裝癖、受虐癖、虐待癖、尿色癖、裸露癖等等。每個人都有某個類型的癖好，睇落又以為係「是日本人」，但因為佢地未能夠喺當下社會文化中得到大多數的認同，佢地會因為自己係「不正常人類」而感到自卑。因為缺乏表現嘅機會，許多神秘嘅性欲望永遠都停留喺超時空要塞……裡面性愛嘅階段。缺乏釋放通常會導致強迫症，因此，大多數人發明出不易發現嘅方法，用於釋放他們的衝動，令到本身正常嘅人唔正常化，難怪日本AV長期領導潮流，因為佢地能夠將幻想變成幾十分鐘現實，喺暗角體現快感。希特勒瘋狂的概念中，有一點比較突出，就是「力量是由快樂產生的！」，而希特勒正正係虔誠嘅天主教徒，亦係最強Sadism role model。

勉強自己去做一個宗教認為的好人，是不會有好結果的。正所謂，「你在欺騙自己，身體卻很誠實。」身邊有唔少同性戀朋友，有D選擇公開自己嚟換取正常人唔正常嘅目光，有D因為宗教問題而將自己嘅愛慾收埋，好似Eason首人來人往咁「快不快樂留在身體裡」。呢種行徑絕對係唔健康嘅行為，教條唔容許？咪「世界將我包圍，誓死都一齊」囉，楊千嬅首「飛女正傳」都有得唱啦，點解要放棄發自內心嘅快樂？

某幾個宗教都有信徒話「來回地獄又折返」，同你講有地獄存在，點解隻字不提下面有同性戀者，癖好者存在？有咩重要得過你仲有感覺時嘅快樂？只有活著，自由才是快樂。你確保唔到你死咗之後仲有冇感覺。全篇唯一一個短故事雖然短，同埋發生喺2000年，但係感覺好深刻。

話說某宗教有青少年團契，我都算係個大學新鮮人，趁暑期工餘時間決定返教會事工一下。年齡嚟講我算係大哥哥，團友廿幾個，有男有女係常識啦。當中有2個男團員引起我注意，我留意佢地並唔係特別奶油定大隻仔，而係默契，非常友誼嗰隻。活動唔講太多，我只係其中一隻帶頭羊，當年主要做電話同ICQ聯絡。

根據資料顯示，佢地都係逢暑假先嚟，平時個團得十個人度。當時嘅我仲有宗教教義嘅羈絆，覺得男男拖手行街出義工活動係好大件事，但係今日回想起……把鬼咩，細路仔邊個唔係手拖手丫……

後來上個月偶然喺一個長者義工場合之下（利申：我冇落區派過麥當勞現金劵同埋當時我已經冇返團契），我喺團契以外嘅場合遇到佢地。活動完咗之後，我同佢地食晚飯，佢地同我講番當時點解離開團契（第一身角度）：

「當時我同早洩（假名）喺團契後諗住同佢farewell，先攬一攬，攬耐咗姐，就俾一個港女見到，零秒散佈話俾人聽我同早洩有路，搞到個牧師即刻打俾我地家長講呢件事，仲話一男一女，一夫一妻先係上帝所悅納的，叫我同早洩離開教會，正常番先好嚟。我好感激我同早洩父母，佢地好支持我地，最後一齊去外國讀書，喺外國先首次接觸到同性文化，開始覺得香港表面上係一個國際都會，但係思想上絕大部份都仲係非常保守。保守唔緊要，香港人保守得嚟仲要管人家事，古有梁祝，今有反同。真係出櫃都需要勇氣，來面對流言蜚語。」

「喺香港我地唯有人前扮朋友，我地嘅關係又唔係單靠性行為，甚至係著重於靈性交流。肛交係男同其中一種性交，但係喺香港好似係違法。不過香港咁多人鍾意走後門，點解佢地得，我地唔得？香港某位議員都係喺港鐵俾人鬧佢嘅性取向，鍾意一個人有罪咩？同性又點!教會成日講大愛，點解連呢種小愛都容納唔到，仲立即趕走我？神都冇話過趕走我但係個牧師仲肯定過個神話我有罪，要立即走……」講講下佢忍唔住喊咗出嚟。作為朋友，我只能夠遞紙巾俾Joseph。

晚飯之後，我同佢地say goodbye，之後我搭巴士返屋企。途中我見到一間教堂，門外有一個張開雙手嘅立像。我開始想像緊咩叫親疏有別嘅大愛，咩叫做有條件嘅愛與恨。既然人本能有愛與恨，我為什麼不可以恨自己嘅敵人？全身心地憎恨你嘅敵人，如果有人在你臉上打一巴，那你也要回敬佢，好似半澤直樹一樣十倍奉還！只會轉另一邊臉給人打嘅係懦夫！你愛你嘅敵人，你嘅敵人唔愛你呢陰公！

變性人，同性戀者等等應該為自己而活，而唔係為其他人而活，呢個就是自由，戀愛自由係唔需要一人一票真普選嘅。性取向唔需要靠民主嚟得到認同，正如我喜歡He-man的一身肌肉與粉紅色的外衣，同我一齊喺廟街打暑期工嘅損友對金剛Barbie情有獨鍾一樣。你唔需要得到其他人批准與認同，你更加唔需要大叫:我愛金剛Barbie。你大叫都唔代表你將會得到認同，與其要歧視你嘅人認同你，不如一齊唱Eason首「黑夜不再來」嗰句「難道討好我等於鼓勵我去歧視你」。

當你傷心失意之時，自救先係正路。求神拜佛之後你會心安，但係問題依然存在。

當你唔夠膽對固有歧視作出反抗，你係永遠唔會得到平等，因為平權最大阻力唔係普通市民，而係教徒同佢地過氣左N千年嘅信仰附帶物–導人向善以外嘅寓言，黑暗過格林童話。

個人喜好，本身冇對錯，老歌歌詞都有句”情憑誰來定錯對”，只有睇你唔順眼嘅人先會標籤你對與錯。問一般無宗教者反唔反對同性戀，充其量咪一句”唔好搞到我就得啦”。係啵，唔關人事，咁關教會咩事？「一男一女，一夫一妻，一生一世囉」。角色扮演咋頂你！21世紀雌雄莫辨，呢秒係男，下一秒可以係女；一夫一妻的話點解會有教徒離婚？要唔要牧師定神父批准？遇人不淑可唔可以跳車呢？家庭崗位一定要限定性別？最後我都想講一句：我地邊一年有得一人一票選教頭呀？

作者 笛子摸曈

潛在軍國主義者，試圖修練百人斬不果，改為專攻魔貫肛殺炮，最後練成幹之鍊金道士，希望一筆在手，世界瘋行。