失落嘅「陀地」－煙消雲散嘅中文H Game

Decrease Font Size Increase Font Size 文字大小列印電郵分享

「有北姑有陀地，百五蚊全套。」

「試下陀地吖。」

然後係乜，大家睇過《國產凌凌漆》嘅都好清楚，唔使多講。

上過141個網站睇價嘅(唔知咩係141？玩呀細路？自己Google啦)，應該都知陀地一般貴過北姑；如果將援交都計埋，就更加唔在話下，貴到hihi。

咁點解以一般民眾咁崇洋，響性呢方面又會有呢種「本土法西斯」現象？

一個原因：同聲同氣嘅親切感，都係賣點之一。性，唔理係埋身肉搏、打丁，甚至就咁響腦入面FF，「親切」都係一種吸引力－當然，刺激、新鮮感都係。邊樣跑出，基本上因人而異。

咁既然陀地有賣點，套入AV、H漫，以至H game，都可能講得通，係咪？之不過，世事當然無咁簡單，唔係都唔會有開頭個gag。今次就拎中文H game出嚟講下。

假「陀地」－日game台灣中譯版

H game呢味嘢，基本上係日本仔獨門產品。唔識日文，或者就算識都想玩得親切啲，就自然想有中文－響呢方面，中文版就等如「陀地」(呢啲嘢唔計較得太多…香港根本就無，台貨都當係，「袋住先」)。老朽九十年代中後期開始玩H game，有日文版，又有台灣嘅中譯版。印象中，玩過最古舊嗰隻中譯版H game叫《華麗人生2》(「大富翁」形式；30個女角，識咗之後開舖等佢賣淫搵錢，好X賤；同埋唔知點解，總係搵唔到隻《華麗人生1》出嚟)，入口做中譯版間嘢叫「天堂鳥」－呢間嘢，似乎專做呢門嘢，因為除咗《華麗人生2》之外，玩過好多隻都係呢間嘢整嘅中譯版，例如咩《IF3愛情方程式》、《轉校生－天使們的午後》、《夢見坡》之類。此外重有幾間公司，叫咩「歡樂島」、「鷹揚」、「華義」，都有做類似生意，將日本H game譯做中文版，佢哋嘅出品都玩過唔少。

想當年，差唔多個個月至少去一次荃灣力生、葵涌廣場，無非都係買收錄一堆呢啲game嘅老翻集錦碟；以廿蚊一隻計，花響呢啲集錦碟嘅錢都有四五百銀。當然，講明係集錦碟，自然唔係成隻都係H game，而係四五十隻game入面有十隻八隻咁。買呢種個好處係多啲其他嘢玩，買到返屋企又呃得到人，無咁易穿煲老尷，一舉兩得。至於質素方面，始終係老祖宗出品改做中文，雖然高下不一，但通常都有啲保證：例如《華麗人生2》，雖然遊戲本身好簡陋，但話晒30個女角，每個兩幅H圖，打丁夠晒用；有啲如《夢見坡》、《IF》系列、《ES之方程式》、《禁斷之血族》系列、《教育實習》、《卒業旅行》，H圖數量同質素都掂唔在話下，而且有返多少劇情／故事性，只要唔好顛到好似某文壇判官咁將《臭作》當愛情小說嚟睇／玩，都真係幾好玩幾enjoyable嘅。

「真‧陀地」出現－台灣自製H game

玩咗兩三年H game，入到九十年代尾，就留意到有真正嘅中文H game－華語地區自製，嗰隻(咪又即係台灣囉)。上文提到叫「天堂鳥」嗰間嘢，九十年代中已經出過三幾隻好簡單嘅H game，叫咩《美女終結者》、《八女神物語》咁。當年買返嚟嘅集錦碟都有呢兩三隻，但開過嚟真係好簡陋－單係以圖嚟講，已經係廢到用當年標準都「丁」力不足。「丁」力不足嘅H game，玩嚟托咩？

之不過，萬事起頭難；新入場整新產品，不足之處嘅嘢梗有，做多兩嘢就會上手，有進步，有新花款。以當年華語電腦game界嘅風氣嚟講，善用中文古典名著做game，「是常識吧」…於是，好快就出現咗三隻稱得上「真‧中文H game」嘅經典作品：《金瓶梅之偷情寶鑑》、《紅樓夢之十二金釵》，同埋《肉蒲團之浪史奇觀》。當中，《肉蒲團》係上面提到嘅「天堂鳥」出品，但更犀利嘅係另外兩隻：出品者，就係台灣game界有名，今時今日都重未摺埋嘅大公司智冠。

呢三隻game，都係九十年代尾嘅產品，基本上都係用DOS平台，屬於最後期嘅DOS遊，製作都算認真，尤其係最後出現嘅《紅樓夢》。由於畫面同背景音樂之類都做得堅咗，遊戲體積都係DOS遊戲之中大啲嗰堆：早少少出現嘅《金瓶梅》係廿幾MB，而《肉蒲團》記得好似係去到七八十MB，《紅樓夢》就更加係過百MB。對當時嘅486／古早Pentium機嚟講，負擔都唔細。不過既然係難得一見嘅「真‧中文H game」，就當然死人冧樓都塞咗入部機都玩啦。

三隻game之中，最早玩嘅係《肉蒲團》；當時嚟講，係好大期望，而初初開嚟玩，眼見畫面都幾靚(限定範圍背景下完成任務，基本上有多少似强国宜家好興嗰啲有建築物嘅網上地圖咁；個地圖整得幾精美)。之但係玩落就越嚟越失望：主角未央生係不斷要「修練」性能力，每過一關係學識《素女九式》嘅其中一招；而過關就當然係「啪啪啪」啦，玩法係似格鬥形式，你用個主角一路係咁插插插，插到個女角投降為止。問題嚟嘞：

咁玩法，玩家點打丁呢？點吉返隻手出嚟用？

隻game另一個問題，就係H畫面強差人意：女角唔可以話係少，每一個啪啪啪關口你都會有圖，無記錯嘅，重係有當時嚟講好難得嘅「動作」(即係角色會郁)。之但係，H圖嘅款式好少，而且面積又細(得成個screen四份一左右)，出嚟嘅效果係令人非常失望。之前提到，將呢隻當埋係經典，其實只係以成隻game個整體規模去睇，同埋係計返「天堂鳥」呢間公司，講到尾都係細雞，肯玩大佢就姑且畀多兩下掌聲鼓勵，咁解。響台灣PTT見到有鄉民今年玩過之後嘅評價，大家不妨參考下：https://www.ptt.cc/bbs/Old-Games/M.1430068524.A.1A7.html

相對嚟講，大廠「智冠」出品嘅《金瓶梅》同《紅樓夢》，可以話係一分錢一分貨，水準又高一截。當中《金瓶梅》出得早啲，啲圖不免無咁靚，用800*600嘅芒去玩都會嫌粗，但基本上係睇得出人物造型有用心，而遊戲模式係傳統嘅執行任務+做選擇unlock achievement之餘，又無流於單調(e.g.攻孟玉樓同潘金蓮要打交，卓丟兒係賭錢、韓愛姐係要吟詩作對之類…等等)，響DOS年代限米煮限飯嘅情況下算係咁。更重要嘅係，戲肉所在嘅啪啪啪場面，係跟劇情文字推進，對玩家嚟講係方便打丁好多。

有圖有真相(non-H)：from http://g.e-hentai.org/g/432804/e4e5075b5c/

遊戲：《金瓶梅之偷情寶鑑》－智冠科技

無記錯嘅，《金瓶梅》推出之後反應唔錯，有見及此「智冠」亦斬多二兩，大約兩三年後(好似係1998)推出《紅樓夢》。玩法都係例牌想像得到，主角係賈寶玉，畀三個月時間你，根據你想攻邊個女角去修練能力值同做唔同任務，然後將女主角啪啪啪之後等ending(考到科舉就維持到賈府唔使死，otherwise有出家，甚至做乞兒之類ending)。有咗之前經驗，技術亦跟住時代進步，《紅樓夢》製作水準又好過《金瓶梅》：H畫面講唔上真係極多，但十幾個女角一人有兩三嘢已經算係夠「丁」，而且畫功方面係精細咗好多，就如下面幾個sample咁：都已經知

有圖(又)有真相(non-H)：from http://g.e-hentai.org/g/537745/1bde8aa889/

遊戲：《紅樓夢之十二金釵》－智冠科技

同《金瓶梅》一樣，《紅樓夢》都算係做到「打丁-friendly」：唔止係遊戲模式，H圖夠大幅，對玩家嚟講絕對係好「丁」好多。而去到呢步，玩家終於有得用中文FF中文名嘅角色去「丁」…好感動哩？「很想要吧？」

「然後，就再沒然後」－曇花一現，從此消失

好不幸，雖然玩家反應算係OK，但《紅樓夢》之後，中文世界嘅土產H game發展，反而係一下跌返去零。甚至，係連中譯日game都開始沒落。

「典解嘅典解嘅？」

呢個問題，當年身為一條腐臭毒淫蟲嘅老朽，成個人浸咗響各類H game、H漫以至AV之中，基本上係去到喪心病狂，僅僅記得返學返工畀家用同記得自己姓乜嘅地步，邊叉會諗咁多嘢？總之有甜嘢睇有得「丁」就得啦。事過境遷，為咗寫呢篇嘢還稿債，花咗少少時間諗下同響網上面八下，大致可以歸納做以下幾點：

1) 台灣遊戲業界內亂：響PTT見有人提到，當年game界涉及好多黑黑白白之類嘅嘢。有油水嘅生意就有黑道，事涉風化嘅就更加：據講，當年做到好旺下嘅「天堂鳥」就係畀黑道睇中，結果搞到成間公司畀人拆晒咁滯，無幾耐亦執咗笠。而白道方面，台灣對情色產品無特定準則規管，唔似日本咁合法化，所以搞H game、H漫之類變成長期高風險，久唔久中次獎畀官府查抄都唔得掂，玩唔過；

2) 上網同OS嘅發展：有留意嘅讀者朋友，應該會發現我講呢啲game都係DOS-based，而去到最後嘅《紅樓夢》就係1999年嘅產品。時間，反映到至少部分死因－OS變，搞game都要跟住變，但響土產H game前景唔明朗嘅情況下，廠商係唔會有咩意思去追住個市。同時上網終於入到寬頻年代，大家要搵各種情色物品去「丁」到死為止，都係易如反掌，何況當時重下開online game嘅年代，無論係供定求，PC-based嘅中文H game呢個segment都係慘遭重創；而同呢點有關嘅，就係第三點－

3) 「陀地」，唔係大晒：質素、質素、質素。「色」，人之大欲，亦係人類最早其中一門生意所在。上面舉呢堆中文H game，響當年嚟講算係「丁」得落，但正如第二點提到，上網去到寬頻年代，日文H-game、AV，大把有得你玩你睇。搞呢啲嘢，麻甩佬麻甩仔，都係旨在一洩：人哋「肉味」勁過你、畫面音效聲色之娛勁過你(e.g.日本ZYX嘅《淫內感染》系列，00-04年出品；人物有配音呢啲已經係行規，由第二集開始有埋GIF式動畫，用響H場面)。有啲朋友鍾意玩劇情、青春校園愛情feel，elf啲X級生系列已經全世界玩到爛；講究啪啪啪要肉味，玩Will Japan、InterHeart嗰啲又得。啱啱先響學行階段嘅中文H game界，又點追呢？後來再有中文H game出現，都已經係好耐之後嘅事，多數係鬥牌／麻雀類online game，已經係另一回事，亦唔見好大迴響。

上文開頭個「陀地」gag，套響中文H game界其實係太刻薄；至少在老朽嚟講，玩過嘅中文H game大部分即使簡陋啲，用打「丁」角度出發都不至係「如花」咁嘅級數。但色之一字，個腦同下半身嘅指揮，就係表現出最無情嘅市場定律。不惑之年將至，回首荒唐之事，眼中見到嘅已經由肉體橫陳變成「市場定律」，應該喊好，定笑好？不過點都好，用幾千字講堆無咩營養嘅咸豐舊事話當年，各位睇完怕且都不免係「屌」一聲…唯有請各位就住我呢啲老屎窟，唔好屌咁大力…啦。