十里夫

一個關於整電腦的愛情食物鏈故事

Decrease Font Size Increase Font Size 文字大小 列印

話說網上最近流傳一張Facebook對話cap圖,內容為一位「女神」欲找IT男幫她砌機,卻因為已有男友而被拒絕:

 

11822419_10207842555328259_131249498843922823_n (1)

原載於:https://www.facebook.com/photo.php?fbid=10207842555328259&set=a.1161084793744.2026145.1426550736&type=1&theater

 

 

觀音兵用電腦知識為娘娘服務的故事,相信大家都聽過不少,但這張cap圖倒是令小弟回想起大學年代朋友之間的一個小故事。

「又要麻煩你幫我搞返掂部Notebook添,冇你嘅話我諗我真係唔知要入幾多轉筲箕灣啦!」住hall的Anna電腦故障率頻繁,由於不想長途跋涉將電腦拿到工廠區保養,有問題總是找o-camp groupmate兼同系同學Ambrose幫她檢查修理。

「整埋今次冇下次呀!下次你自己搵你條仔搞掂佢啦!」長年單身的Ambrose雖然每次都這樣說,但結果卻還是每次都有下一次。Anna的男友在另一所大學讀law,聽說真的很忙,或多或少都是Ambrose心軟肯繼續幫她的原因,當然每次整機後Anna會請食糖水是另一誘因。

其實這種關係早已在系內引來一些緋聞,甚至指Anna一腳踏兩船,特別是由於Anna樣貌、性格、身形和身材皆不錯,故即使Facebook已寫明是「in a relationship」,一直仍然不乏追求者。這在她所住的男女hall中情況特別嚴重。

雖然雙方都大概沒有明言過,但Ambrose和Anna其實都很清楚明白這一段關係的意義:Anna除了電腦真的經常故障外,在大學範圍她還需要一個男性朋友幫她擋狗公,而沒有威脅的Ambrose就是最佳選擇。為何Ambrose沒有威脅?因為Anna知道,他一直單戀著某位中學時代已認識的鄰校女同學,對自己不會有興趣,或早已認定跟自己不會有發展的機會。

Anna所不知道的只是,Ambrose之所以樂意替自己修理電腦,是因為他那位單戀對象所用的電腦型號相同,幫Anna修理可以熟習那型號的運作,好為他替真正的對象服務。

「喂,我同房Julia話佢部電腦都有啲問題,不如下次佢喺度嘅話你順便幫佢睇睇?」在糖水舖中Anna不經意地提起她那位收兵成性的同房娘娘,其實純粹為找個話題。

「咪搞,當兵都要睇下件娘娘值唔值當先啦,況且佢本身咁多兵仔樂意效勞,幾時輪到我呀?」

「冇晒咁滯啦,比人踢爆原來一直有男朋友但扮冇,啲兵即刻集體退役。」聽到Julia竟然一早有男友,連Ambrose都不禁O嘴了一下,不知怎樣回應,因為她是出了名一直往男性堆裡轉,幾乎每次出街約會的對象也不同,更經常是一些同學飯聚中的唯一女性,似乎很享受讓狗公圍著她轉。

老貓燒鬚,睇戲趁早,夕陽美好得一陣,睇人仆街更開心,Ambrose最感興趣的自然是Julia為何會被踢爆。Anna回頭四處望一望,確定沒有相熟的人在附近後,才繼續說:「主要咪因為Elton囉,早排佢地咪inter-hall English debate時識咗嘅,有次佢哋兩個去食飯,Julia返嚟即刻狂嗔兼唱話佢冇風度又剩……」

「吓?半洋腸Elton喎,點會呀?」Elton早年在外國長大,近三、四年才隨家人回流香港,是謂「半洋腸」,諷刺地卻是一個草食男。

「我都覺得驚奇,之後我八到其實係Julia自己擺晒款當正Elton想入伍咁在先……」

「所以Elton踢爆佢有男友?」

「咁又唔關Elton事,而係當Julia唱佢冇風度時,傳咗入佢班紅顏知己耳中,咁女人對付女人又真係狠啲嘅……好似仲爆埋出嚟話原來Julia條仔係成日周圍撩女爆房嗰啲人。」說來話長,Elton女性朋友眾多,但幾乎全都有另一半,因此有時被揶揄為「公家兵」。Julia收兵成性,卻偏偏因一隻「公家兵」而燒鬚,淪為同房的八卦話題,也許真的冥冥中自有天意。

事後聽聞此事,當兵成性的小弟倒是覺得Julia有點可憐,收兵收至身邊男性朋友全都是圖謀不軌之徒,個個目標為本,一知道她有男友就作鳥獸散,以娘娘來說實在是一個非常失敗的例子。

之後就再沒聽到Julia的事跡了,不知她有沒有向同房Anna好好學習對待狗公之道。要在有男友之後仍然保持吸引力,其實唔難,關鍵是最初請勿以單身作為收兵的賣點。正如Ambrose所言,狗公當兵時都真係會睇下件娘娘值唔值當架!

 

 

=============================================

Mall Mall Store貨品來自英美,代購費用低廉!

http://bit.ly/29bRWoO

經連結申請DBS Black World MasterCard,新客戶即賞額外1,000里數,迎新優惠可享$1.2=1里。

https://go.dbs.com/29fpTdL

iHerb售賣美國有機健康產品、日用品、護膚品等等,買滿指定金額可享免費順豐送貨。首次購買結帳時輸入DCP206折扣碼,可享$5 USD折扣。

http://bit.ly/29hCycg

=============================================