【情感信箱】明明新歡不如舊愛，點解佢仲會移情別戀？

Photo via cc Flickr user dave.see

你好，小弟自問條件唔差，對女友無微不至，但最近女友有第三者。當我知道咗對方係咩人，更加O晒嘴，又樣衰，又無錢，到底佢諗咩？明明新歡不如舊愛，點解佢仲會移情別戀？

心急人上

【亭長回信】

心急人你好，

首先你要明白，愛情唔係符合一籃子因素就會發生。你做晒A-Z，對方可以不屑一顧；另一個人只係做咗A-C，但可以令個女仔死心塌地。你愛佢，屎你都會當係含有豐富營養嘅食物；你唔愛佢，鑽石都只會當係一舊碳。喺好唔科學嘅愛情之下，用量度同計算嚟解釋未必咁Work，唔係點會有愛上仆街呢類悲劇發生。BTW，如果你有錢可以成為留低身邊人嘅原因，咁代表對方當你係飯票。

亭長

【副編回信】

心急人你好，

愛情呢家嘢最奇妙之處，就係唔可以單純以物質或者以感覺嚟到去解釋。高大靚仔有錢固然會有優勢，但唔代表你會因此而必然得到囡囡嘅芳心。人係一種好貪新鮮，而且唔識珍惜所擁有嘅動物。你條女離開你搵個條件好似差過你嘅人，除咗可能關你事，亦都可能係因為對得太耐，你喺其他方面已經滿足唔到佢，例如係好奇心、刺激感等等。不過天下之大，無謂為咗一棵樹放棄成個樹林，既然緣盡嘅話就不如嘗試放低佢，去搵一個更識珍惜你嘅人啦！唔好死！

副編

如何寄信至風月亭情感信箱？

來信一覽

作者 亭長

你好，我是總編輯，又稱亭長。