戀父癖之謎：點解我揀老男人

講戀父，真係不得不提林建名同何傲兒……（網絡圖片）

每個啱啱熟我既人都會問一個問題：你真係xx歲？點解會同xx歲既男人拍拖？

其實我就想統一答關你地撚事既，不過礙於形象問題我都會禮貌上答下。

咁其實點解呢？

唔知大家人生有冇遇過幾pair情侶，拍左五六七年但最後分手，你問原因佢地會話性格不合因了解而分手囉云云。

bullshit 啦！你唔係信呀？拍左幾年至黎發現性格不合相處有問題咁趣致？其實正路原因得兩種。

1. 環境影響

點解咁多人一上到大專大學就分手？點解咁多人一出社會工作就分手？咪就係因為環境轉變眼界闊左囉。

發現呢個世界好大，接解既階層闊左，自己既可能性好多，咪出產左無限個 James 囉。唔難見到嫁，不論男女大把人一升大學黎個大解放啦，一做野就跳船嫁。其實呢一切好平常，當見識同經歷轉變既時候追求既野當然會唔同，喂以前既女神好靚女喎雖然平左啲，不過都值得校草追既。上左大學發現靚過佢既大把，仲要有波添。喂以前考第一嗰個又唔靚仔憑乜揀靚女先，出到社會發現有錢大把索女投懷送抱囉。 有乜辦法唔變吖～

所以我揀老男人，因為再靚既女人佢見過，再姣既八婆佢溝過，食過一千蚊一個lunch，捱過20蚊一碗魚蛋河，唔會再對外面既花花世界感到新鮮好奇。佢清楚呢個世界點運行，知道自己屬於呢個社會既邊個位置，咪搵返一個點既另一半。佢好穩定佢好安全，我要擔心既下一個大轉變可能只係佢既更年期，同我自己會變心。

問心嗰句，我只係自卑，我驚有日個o靚仔會發現呢個世界好大，比我好既人太多，我係怕俾人 come on 淫娃 。

2. 階段唔同

呢樣真係最慘。女人係好撚膚淺，對成熟既定義就係任何建基於成家立室既考慮，我敢講十個女人九個都係渴望三十歲時擁有一個完美既婚姻同家庭。男人呢就醒好多，去到廿尾三十就開始驚做老襯怕被困。

你計下，時間係完全唔夾既，當你廿七八開始心急既時候，你既另一半仲喺成長期，而你仲爭幾年就變撚埋究極體。你會開始催婚，開口埋口講下禮金同買樓，但你個男朋友bb仲研究緊隻D字頭既ps4 game 。 衰啲嗰班，都未玩夠見識夠，點會肯埋你單？就算肯，一個冇父幹既男人三十歲又點埋到你單（香港做男人真係好慘）。

好啦俾你捱到佢事業有成又玩夠啦，起碼有錢租層200呎既小蝸居有錢裝下修，你地都三張幾四張野啦，如果我係鑽石王老五，你估我會揀廿歲雙皮奶定四十歲巢皮奶？

揀老男人就唔同，當我想邁向人生另一階段既時候，佢唔會同我講佢仲未知想要邊種女人，想拍下散拖浪費大家時間，佢隨時 ready 。

講真我冇乜自信我個巢皮奶可以揮低青春既肉體，所以我選擇做賤人，我想襯後生綁架佢地，換黎唔會俾人掉低。

其他老男人既好處，見識、交際手腕等等其實都因人而異，幼稚呀叔多的是，不過呢啲講比例既，後生我都會好欣賞，梁天琦馮敬恩呢type喺後生仔群難搵左啲。更何況都係嗰句，莫道我在選擇人 人亦能選擇我，我邊係佢地嗰皮呢，想食好野唯有揀老啲囉，你估真係貪佢地短命可以守生寡咩屌。

作者 幼齒淫娃

真係好幼齒嘅淫娃