點解地鐵車廂角落位塊玻璃有浸除

Photo via cc Flickr user malias

果日地鐵車廂特別焗，雖然架車唔係多人，我都覺得唞唔到氣。我站頭上車坐咗響角落位，搭咗三四個站，有對情侶手拖手上咗車，個女仔蘿柚挨住我個頭挨緊個塊玻璃。佢著住條白色熱褲，我睇得出佢買細咗一兩個碼，因為條褲就嚟扎唔住佢翹臀嘅軟肉，大腿彷如一條臨崩嘅水壩咁，我隔著塊玻璃都感覺到呢股迫力。

我閂咗電話螢幕，用黑色鏡面繼續睇住佢哋兩個。我發現佢哋兩個打車輪打到有一個節奏，架車行入隧道嘈到拆天嗰陣，佢哋兩個就最激情，兩個人頭忽升忽降，忽左忽右，用嘴唇拉住對方，以舌頭作舞鞋跳探戈。埋站廣播時節奏就變慢，我淨係望到個男人個表情，冇象徵佔有慾嘅淺笑，亦都冇怕人議論咁左望右望，只係好專注咁望住個女仔對眼。如果塊玻璃清啲嘅話我分分鐘可以從佢雙眼睇到女仔個樣。佢哋一快一慢，由站頭搭到站未，行車時濕吻，埋站時換氣，就好似專業樂手咁。

呢個，濕吻／運氣嘅循環重複咗九次，佢哋就落咗車。我望下塊起左霧嘅玻璃，用手一抹，原來濕嘅係另一邊。自此之後我就冇坐過角落位。

作者 日生