過了耳聽愛情的年紀
成日話港女拜金，男人有車有樓揸手先會鍾意，我自己對呢種心態一直都甚為不解。直至到咗行年二十有幾，終於有啲明白點解女人會咁諗 ——
重點唔係男人而家幾有錢，而係佢肯為咗你去搵幾多錢。
細個嗰陣，或者大家都試過為一個人好瘋狂。呢個人多數無乜錢，對你又唔係特別好，亦未必好專一，但你總會死心塌地咁愛過一次。當時你唔會計較同佢日日食譚仔，去佢屋企瞓上格床過夜，甚至出錢幫佢交埋電話費。咁都毫無怨言，係因為佢講過遲啲會去進修攞返張cert，又或者去考政府工，諸如此類，總之好快就會有穩定收入，到時就可以有自己嘅屋企、好舒適嘅二人世界，bb豬豬豬豬bb愛死你乜乜物物。
你會毫不保留咁相信，今次終於遇到真愛，佢一定會洗心革面，痛改前非，同你計劃生兒育女，幾時退休環遊世界……呀係呀，女人就係有種通病，次次都以為自己遇到真愛。
然後，你會發現，一年又一年咁過去，佢仍然只係每個weekend留喺屋企打機，為咗踢波唔陪你睇醫生，一個月淨係飲酒都洗幾千，每個月仲要偷偷地幫佢增值八達通，驚傷到佢自尊心……有一日，你忽然發覺所謂「將來」，好似仲係好遙遠，覺得好攰好攰，已經無辦法再同佢行落去喇。
恭喜你終於醒覺，偉大愛情好少可係用把口講出嚟嘅。
過咗耳聽愛情嘅年紀，人長大之後愛情仲要講現實。唔好誤會，我唔係話「講金唔講心」嗰種現實，而係除咗甜言蜜語之外，究竟仲有咩嘢令你睇到佢對你投放嘅感情。
知易行難，講永遠都容易過做。就算佢應承你嗰一刻係如何真心真意，到真係要落手去做，佢過唔過到要努力進修、搵工、開OT捱眼瞓嗰關？佢話會對你好好，咁佢捨唔捨得放棄去玩、去hea嘅時間嚟陪你、氹你？成就其實唔重要。喺香港地，你以為搵到個新男友比舊男友多兩千蚊人工就會上到樓喇咩？唔會架嘛。搵伴侶，其實講到底都係搵個行動上證明到佢愛自己嘅人，而唔係單單口講愛話你。
如果而家再遇到呢種人，就算點樣怦然心動、小鹿亂撞，我估你都會同自己講……「仲細咩！」。
一個人再如何誓神劈願話愛你，都唔及另一個肯投資時間喺你哋將來嘅人嚟得實實在在。
=============================================
Mall Mall Store貨品來自英美，代購費用低廉！
經連結申請DBS Black World MasterCard，新客戶即賞額外1,000里數，迎新優惠可享$1.2=1里。
iHerb售賣美國有機健康產品、日用品、護膚品等等，買滿指定金額可享免費順豐送貨。首次購買結帳時輸入DCP206折扣碼，可享$5 USD折扣。
=============================================
