女人帶男人爆房就正常，男人帶女人爆房就猥瑣咸濕？

photo from PEXELS

是咁的。

前幾日睇見呢個網有爆房攻略，見到有個app好用，咪推介下俾有土地供應問題嘅親朋戚友用下咁。咁啱聽見對面檯個女同事仔頭痕緊同男朋友去邊間酒店好，平時食飯都有同佢傾開偈嘅我，咪諗住介紹下個app同share篇文佢睇下囉，點知咁就出事啦。

我: 咦，你想book房同男朋友慶祝呀？

女同事: 係呀佢就快生日啦。

我: 我前幾日都同女朋友book咗間，都幾平呀，五星級都係八百蚊有找，仲有得用個app入我個referral code，再平啲架！

女同事: 咦，你邊度睇到架

我: 冇呀，咁啱google search「爆房」，就見到呢篇文啦，你都可以睇下有咩酒店好架。

女同事: 乜你咁咸濕架！

「屌你個八婆，你同你條仔就唔係爆房，我同我條女就叫爆房？」我心裡好想講出來，最後為咗扮工室保持和氣冇出聲。

悲劇就咁發生咗。

另一早上，我俾腦細召喚

腦細: 你做乜性騷擾啲女同事呀？

我: …吓!

腦細: 依家出面啲女同事話你好咸濕，叫人去爆房喎。

我: 我邊有？

腦細: 唔理你講乜啦，你都有女朋友啦，唔好搞啲女同事呀！

仆你個街，依家女人講book房就冇問題，男人講就猥瑣咸濕？依家我叫你入我個code啫，唔係叫你俾我入個窿呀，八婆! 大家都係同另一半爆房，你班女人就爆得好高尚，我就爆得下流賤格？仲要唱通街話我好咸濕你？

呢一刻，我好想引用返廢陶名句:

「送比我都唔屌呀！」

作者 扮公室小薯